Forca e Re Demokratike e kryesuar nga Nazif Cungu dhe Iniciativa Qytetare e kryesuar nga Vasel Sinishtaj nënshkruan sot marrëveshje për dalje të përbashkët në zgjedhjet e tetorit, njofton agjencia MINA. Ky është koalicioni i parë zyrtarë i subjekteve shqiptare për zgjedhjet e ardhshme.
Sinishtaj mbas nënshkrimit të marrëveshjes në mes të Forcës dhe IQ, deklaroi se janë të hapur për bashkimin edhe të partive tjera në këtë koalicion.
Ai theksoi se kishin biseduar edhe me subjekte tjera dhe kishin pritur bashkimin me Alternativen Shqiptare.
Sipas fjalëve të tij, ai është i bindur se ky koalicion do të fitojnë një mandat të sigurt por do të përpiqen të fitojnë 2 deputetë.
Sinishtaj gjithashtu tha se do të ishte e logjikshme që koalicionit të i bashkëngjitet edhe Lidhja Demokratike pasi ata edhe ishin së bashku në klubin e kaluar parlamentar në Kuvendin malazez.
I njëjti burim sqaron se bazuar në marrëveshjen e sotme, Forca dhe IQ do të shkrihen në një subjekt deri kah gjysma e vitit të ardhshëm.
Në lidhje me nënshkrimin e marrëveshjes, kryetari i Lidhjes Demokratike, Mehmet Bardhi për agjencinë MINA u shpreh se ky koalicion është interes i brendshëm partiak dhe se të drejtat e shqiptarëve nuk mund të fitohen edhe në rast të daljes në zgjedhje të bashkuar, pasi Ligji zgjedhor është diskriminues dhe nuk siguron përfaqësim proporcional. Megjithatë Bardhi tha se edhe më tutje është i hapur për bisedime të daljes së përbashkët të subjekteve shqiptare. /Malesia.Org/
Kumtesë për opinion nga Forca e Re Demokratike
Forca e Re Demokratike, për të bërë një front të përbashkët shqiptar morri vendim sot me date 03.shtator 2012 në mbledhjen e Këshillit Qëndore që të hyjë në zgjedhjet e ardshshme bashkë me Iniciativën Qytetare të Malësisë.
E ndërmarrim këtë hap të bindur se me anë të këtij bashkimi do te mund të sigurojmë një sukses elektoral dhe do të cojmë përpara interesat e popullit tonë.
Programi i Forcës së re demokrtaike është shumë i përafërt me atë të Iniciativës Qytetare dhe kemi identifikuar shumë pika të përbashkëta ku do të mundemi të bashkëpunojmë ngushtë.
Bashkimi i dy subjekteve definitivisht do te behet deri me 30 qershor te vitit 2013 në formën më të përshtatshme organizative duke rrespektuar emrin FORCA për bazë të emrit të subjektit të ardhëshëm
Ne besojmë se kjo aleancë i shërben më së miri interesave të shqiptarëve të Malit të Zi duke i ndalur dallimet krahinore dhe fetare që fatkeqësisht kanë zënë rrënjë në komunitetin tonë.
Përfitojmë nga ky rast për ti bërë thirrje të sinqertë, pa kushtëzime, të gjithë faktorëve të tjerë politik shqiptarë që të na bashkohen.
Me sistemin e ri zgjedhor ky bashkëpunim bëhet domosdoshmëri për hir të një përfaqësimi parlamentar sa më të madh shqiptar.
Prandaj duhet dëshmuar përgjegjësi dhe largëpamësi, duhen lënë mënjanë mosmarrëveshjet apo përplasjet e egove tona, si dhe duhen kapërcyer ndasitë krahinore dhe fetare për hir të bashkimit të subjekteve
Ulqin më 03.09.2012
