Prishtinë, 21 korrik – Autoritetet shtetërore franceze i kanë përcjellë ministrit të Punëve të Jashtme të Republikës së Kosovës, Enver Hoxhaj, lajmin e hidhur për gjetjen e trupit të pajetë të poetit të njohur kosovar Ali Podrimja në Francë.
Sipas burimeve jozyrtare, Ali Podrimja është gjendur i vdekur në një ulëse të lulishtes(parkut ) të qytetit Lodeve të Francës, ku ishte ftuar në festivalin e poezisë “Vox de la Mediterranii”. Ende nuk dihet kur do të kthehet trupi i pajetë i poetit të madh në atdhe. Nuk dihet tash për tash as për ditën e varrimit të Podrimjës
I tronditur nga kjo humbje e madhe, ministri Hoxhaj i shpreh ngushëllimet më të sinqerta familjes së poetit Podrimja, komunitetit të poetëve, shkrimtarëve e artistëve, si dhe mbarë popullit të Kosovës.
“Humbja e poetit me renome ndërkombëtare, Ali Podrimja, është një humbje e madhe jo vetëm për familjen dhe miqtë e panumërt të tij, por një humbje e jashtëzakonshme edhe për kulturën dhe artin kosovar, shqiptar e më gjerë. Kujtimi i poetit Ali Podrimja do të jetë gjithnjë i gjallë në mesin tonë dhe do të shërbejë si figurë motivimi për brezat e ardhshëm të Kosovës”, thuhet në telegramin e ngushëllimit të ministrit Hoxhaj.
Poeti Ali Podrimja ka humbur kontaktet me kolegët dhe miqtë e familjarët e tij nga data 18 korrik, në kohën kur po qëndronte në Francë, në kuadër të festivalit të poezisë “Voix de la Méditerranée”, në qytetin e Lodève.
Autoritet franceze po punojnë në zbardhjen e plotë të rrethanave të humbjes së jetës së Ali Podrimjës.
Ministria e Punëve të Jashtme e Kosovës falënderon autoritetet e Ministrisë së Jashtme dhe asaj të Brendshme Franceze, si dhe të gjitha institucionet e tjera lokale e qendrore në Francë për angazhimin maksimal të tyre në ndriçimin e këtij rasti.
