Mali i Zi po bëhet gjithnjë e më shumë rus. Sipas të dhënave kadastrale të vendit tonë fqinj, rreth 40 për qind e patundshmërive është në pronësi të shtetasve rusë, mndër të cilët shumica janë politikanë dhe punonjës shtetërorë.
“Mali i Zi tash e disa vite është shumë e popullarizuar në mesin e rusëve. Çdokush mund të blejë tokë apo shtëpi dhe banesë, kurse çmimet janë jashtëzakonisht të volitshme”, tha për Nova Gazeta përfaqësuesi i shoqërisë ndërkombëtare për shitblerje të paluajtshmërive Mont Estates.
Në pronësi të rusëve të kamur, shumica e tyre të lidhur me partinë në pushtet të Putinit Rusia Unike, janë tashmë shumë hotele dhe ngastra të mëdha tokash, kurse disa vendbanime të vogla në Malin e Zi i kanë emërtuar “fshatra ruse”. Ndër më të kërkuarat janë tokat në bregdet, në vendet Budva, Hercegnovi dhe Tivat. Për shkak të numrit të madh të shtetasve rusë në qytetin Budva madje është hapur edhe një shkollë private në gjuhën ruse.
Nova Gazeta ka hulumtuar këto vendbanime në Malin e Zi për të kuptuar se cilët janë politikanët dhe administratorët rusë që kanë prona në këtë vend. Dhe kanë gjetur mjaft të tillë, madje edhe të dyshuar për korrupsion dhe anëtarë të partisë në pushtet. Por, nuk kanë hasur në emra me ndikimin më të madh në Rusi, pasi që, sipas saj, ata zgjedhin vendpushime edhe më prestigjioze e më të shtrenjta në botë. /KohaNet/
