Kryeministri i përkohshëm i Libisë, Mahmud Xhibril, tha se lideri i përmbysur, Muamer Gadafi, është vrarë.
Në gjithë kryeqytetin Tripoli po dëgjohen të shtëna festive dhe brohoritje: “Zoti është i madh”.
Komandantët e Këshillit Kombëtar të Tranzicionit (KKT) thonë se trupi i djalit të Gadafit, Mutasin, po ashtu është gjetur në qytetin Sirte.
Zyrtari i KKT-së, Abdel Maxhid Mlegta, i tha agjencisë së lajmeve Reuters se Gadafi ka vdekur pasi që është plagosur në këmbë dhe kokë.
Zyrtarët thanë se Gadafi po përpiqej të ikte në një konvoj, i cili u sulmua nga aeroplanët luftarakë të NATO-s.
NATO-ja tha se aeroplanët luftarakë të saj kanë goditur dy makina ushtarake afër Sirtes, mëngjesin e sotëm, por nuk konfirmoi nëse ato po bartnin Gadafin.
Raportet thonë se ushtarët kanë vendosur flamurin e ri kombëtar në ndërtesat në qendër të Sirtes, ndërsa të tjerët po festojnë duke gjuajtur në ajër.
“E dimë sigurt se Sirte është çliruar dhe kjo është një ditë e madhe për popullin libian, i cili e ka pritur këtë moment të çlirimit”, tha zëdhënësi i KKT-së, Mahmud Shamam.
Agjencia e lajmeve Associated Press ka raportuar se të paktën 16 besnikë të Gadafit janë zënë bashkë me municion dhe kamionë të mbushur me armë.
KKT tha se rënia e Sirtes do të jetë kthesa kur Libia do të shpallet e çliruar, duke nxitur kështu krijimin e qeverisë së re brenda një muaji. /REL/
