Tuz, Malësi – Drejtori i gjimnazit “25 Maj” në Tuz, Semir Laleviq i cili gjatë tetorit të kaluar përmes mbishkrimeve në muret e shkollës ishte akuzuar për sjellje të pahijshme gjatë ekskursionit që patën nxënësit e gjimnazit, të premten e kaluar ishte temë në emisionin “Fiks Fare” të televizionit Top Channel.
Me kthimin e nxënësve, profesorëve dhe drejtorit nga ekskursioni, në muret e gjimnazit u shkruan akuza për sjelljen e pahijshme të drejtorit ndaj nxënëseve gjatë ekskusrionit.
Gazeta “Vijesti” për këtë rast kishte shkruar se nxënësit akuzojnë drejtorin se ai kishte pasur marrëdhënie me një nxënëse dhe se ekzistojnë edhe fotografi të cilat mund të vërtetojnë dyshimin për keqsjelljen e drejtorit.
Drejtori i shkollës Semir Laleviq kishte njoftuar policinë për mbishkrimet në muret e shkollës dhe kishte hedhur poshtë akuzat të cilat ju ngarkuan atij, dhe kërkoi nga ata të cilët e akuzojnë që nëse kanë fakte për sjelljet e tija të pahijshme, të dalin me ato fakte publikisht.
Emisioni Fiks Fare të premten një nder temat kishte edhe këtë, ku dhe publikuan edhe fotografi të drejtorit të cilat i komentuan si sjellje jo-normale e drejtorit.
Fiks Fare është një emision i gazetarisë investiguese i cili kritikon dhe ngre probleme duke përdorur humorin dhe satirën për të denoncuar dukuritë negative si korrupsioni, mashtrimi, fenomene të shkeljes se ligjit nga zyrtarë, shkelje të të drejtave të njeriut, çështje të zhvillimit të vendit etj. /TCH – Malesia.Org/
