TAEKWONDO - NË ITALI PËRFUNDOI KAMPIONATI EUROPIAN PËR SENIORË postuar:  22.04.2008

Gjyqtarët e lanë Junçajn pa medalje

Driton Junçaj dhe Martin Lulgjuraj, seniorë të SHS "Besa" që përfaqësuan Malin e Zi në Kampionatin Europian Romë, nuk ia arritën të fitojnë ndonjë medalje. Numri i shteteve pjesëmarrëse ishte 43.

Përfaqësuesi i kombëtares së Malit të Zi në Kampionatin Europian të taekvondosë, që u organizua javën e kaluar në Romë, Driton Junçaj (në kategorinë +84 kg), ka qenë afër marrjes së medaljes së bronztë, pasi që ai në xhiron e parë e mundi finlandezin Timo Heinom me rezultatin 1: 0, por në xhiron e dytë ai u mund nga spanjolli Fernandez. Një kohë të gjatë Driton Junçaj udhëhoqi ndaj kundërshtarit spanjoll me rezultatin 2:0, por pak para përfundimit të luftës ai u dënua me pikë nga arbitrat kurse në vazhdim të duelit, Fernandezi pati shumë fat.
Pas kthimit nga Roma, Driton Junçaj për "Kohën javore" u shpreh se para shkuarjes në Romë pati disa lëndime të këmbëve, por falë fizioterapeutit, Dodë Junçaj që bëri të pamundurën për t`i ndihmuar, ai arriti të marrë pjesë në këtë kampionat. Për përshtypjet e tia që la në Romë ai falënderon trajnerin internacional të taekwondosë nga Zagrebi, Boris Budora, i cili e përgatiti për këto gara, pastaj trajnerin e vet Nikollë Gegaj, si dhe trajnerin e ti në Tiranë, Kim Jun Ki.
"Dihet se Mali i Zi nuk ka një përvojë të madhe, si një Spanjë për shembull, apo dikush tjetër. Por, sido që ka përfunduar, kjo për ne paraqet një sukses, sepse në këto gara prestigjoze Mali i Zi mori pjesë për herë të parë", thotë ai. Junçaj tregon se në Romë pati mjaft përkrahje nga tifozët sllovenë, kroatë, boshnjakë, si edhe nga ata shqiptarë.
Ndërkaq, trajneri Nikollë Gegaj tregon se në kampionatin europian për seniorë, të organizuar në Romë e kishim në dorë medaljen e Driton Junçajt. "Filluam edhe të gëzohemi për fitore, mirëpo në fund protestimi i spanjollëve na solli dëm neve dhe kështu referët përfundimisht e shpallën spanjollin Fernandez fitues të duelit. Kështu Junçaj mbeti pa medalje", shprehet ai. Ai bën të ditur se në palestrën Pallaco Delosport- Pallallotomatika, reprezentacioni i Malit të Zi e zuri vendin e katërt. "Ky për ne është një sukses i madh, me çka ne atje dëshmuam qartë se kemi sportistë, që dinë dhe mund t`u kundërvihen edhe atyre më me famë europiane.
Përfaqësuesi tjetër i Malit të Zi në Europianin e Romës, Martin Lulgjuraj
(-72), humbi në xhiron e parë nga britanezi, Dejvid Etminanija. rr.d. (Koha Javore)